أگطاع بين البو محفوظ و السالك مگان
البو :
گَابَـظْ لِي يَـمْ ؤُتَعْرَفْ كَــمْ@لَـكْ فِـيهْ، ؤُلاَ نَبْقِيكْ اتَّمْ
فِـيهْ إِيلَ فِيهْ، ؤُتَمْ اَهْـتَـمْ@بَـلِّي خَاطِيهْ، ؤُدِيرْ اَعْلِيهْ
اَجَّـهْـد، ؤُخَـلِّـي ذَاكْ الْـيَـمْ@نَبْـقِـيكْ اَتْخَـلِّيهْ إِيلَ فِيهْ
وَاللِّي يَعْنِيـنِي مَنْ الُامُـورْ@اَتَّــمْ اَمْـعَـلِّي شَــانِي بِـيهْ
وَاَتَّمْ اَمٔنَـيْنْ اَنْـعُودْ اَنْـدُورْ@اَتْـگَـلَّـلْ فِيـهْ اَتْگَـلَّـلْ فِيـهْ
السالك:
ذَاكْ اللِّي گَـابَظْ لَكْ مَنْ يَمْ@اَعْلِيـكْ اَتْحَـتَّمْ صَبْرُو گَمْ
وَ اَصْبَرْ لَيْنْ اَعْلِيكْ اَتْحَتَّـمْ@صَبْـرُو مَزَلْت اَطَّبْ اَعْلِيهْ
سَافِي عَيْنَكٔ عَنٔ گَصُّو تَمْ@سَافِي عَيْنَكْ عَنْ تَمْ أَيْدِيهْ
ؤتَمْ أگْبَظْلَكْ ذَاكْ التَّطٔرَاگْ@الْ حَدْ اَتْجِيـبُو وَ اَتْمَشِّـيهْ
ذَاكْ إِلَفَاتْ اَخٔلَگْ وَاَنْتاَگْ@اَعْلِيهْ، أَفصَلْ گَاعْ اَحْنَ فِيهْ
البو:
نَـخْـتَيْـرَكْ كَنـتْ أَلَّا تَفٔـهَمْ@ذَاكْ، ؤُلَا تَـيـتْ اَتْبَـلْ اَقْلَمْ
فَـيـهْ، ؤُلَا لَـوْحْ أَيَّـاكْ إٍتَـمْ@جَـلَّكْ مَنِّي مَفْلُـوشْ اَعْلِيهْ
وَللَّ يَنْجَـاكْ اَبْـيَـمْ أَطَــمْ @مَـنْ ذَاكْ ؤُتَـعْـرَفْ لَـمَّـدِّيـهْ
وَاَنْتَ كَنتْ اَمْن أَخَيرْ الْغَيرْ@يَـالـنَّـبِـيـهْ ؤُوَلْ الـنَّـبِـيـهْ
ؤشِ نَخْتَيرْ اَتْجَوْلِيهْ أَخَيرْ@اَتْجَـوْلِيـهْ ؤُتَمْ اَمْجَـوْلِـيهْ
السالك:
اَعْـنَادَكْ وَاَحْمَارَكْ فَـالْبَـدْ@ع ؤُكِـيفَـكْ فِـيـهْ أَلَّا نَشْهَدْ
بَعْـد اَبْـگَـلَّـتْهُمْ مَاهِي رَدْ@ؤُنَـكْرِي حَدْ إِعَـانَدْ لَكْ فِيهْ
ؤُحَدْ إِحَامَرْ لَكْ فِيهْ ؤُحَدْ@كِـيفَـكْ فِـيهْ اَمَّلِّي نَكْـرِيهْ
ؤُهَـاذَ بَـعْـد أَلَّا رَدْ اَمْــرَادْ@ؤُنَـادَمْ فِيه أبعد اتواسيه
مستغفر فيه ويعمل زاد@مولان ما يگبظني بيه