تعانى دولتـــنا من نهـــب / أمسبب فالثــــروة نـَزيف
وراي لثلثين من الشعب / تصــــــدر مذكــرة توقيف
السيـــاسى عــــــــاد إردح / بالشعب أنختيــــــر أنوضح
ألا لوخـــــاظ المترشــــــــح / إجي بلْســــان إعود أخريــف
وإجي متســــع مطــّـــــــرح / يستعطفنا ونكٌـــولو فيــــــــــف
وتشوف الخلق أللي يظبــــح / باتعيش النصر ألنا حليـــــــف
عالن عن دعمو ومصــــرح / و ماشى لفيـــــف أورى لفيــــف
يدعـــى ويمعنــــى ويلمّــــح/ ويجمع بطاقــــات التعـــــريف
ذاك إزوكٌى .ذاك إلــــــــوح / دون المرشـــح ســـل السيف
أذوك من أعياط بعد النبح / والثـــانى لمـــــــا عس إجيف
ومنين السيـــــاسى ينجح / ليديه إكــز أعليه كْــــــــــريف
يبكٌى هون الشعب إهــوح / إكـــــرر ياللى يـــــالطيــــــــــف
الوضع ألا مافات أصلـــح / وحنا نســـــــــألك التــــخفيف
من لاهى للوضع إصحح / من للبـــوادى واهل الــــــريف
من لاهى إزيل أوسخ يفظح / ويعــــــــدل حملة للتنظيـــــــــف
مَنْ للمحتــــــــاج أل يتلتح / مَنْ للأصـــــــم والكفيـــــــــف
من للمريض أل كحـــــكح / من للفقيـــــــــــر والضعيــــف
يالسياسى شــرّح مـــــرّح / أكول طيب هـــذا سَخيـــــــــف
مـــاهو معقــــــــول ألاهي وح / ألاهو زيـــــــــــن ألاهو شـــــريف
من ساعــت لتعيـــــن تكفل / وتكـٌــول آن ينســــــــــــخ مل
لقدر من الدهـــــر أمكمل / مقصــى وأنعانى من لكنيــــف
ظــــــــرك أزلاي معكـــل / شــــــاريه أدنيــــــه أداريــــف
وفجلب عتـــروس إولول / أنار أديارى زين أتزخريـــــــف
أكرداي أكبير أكلب أكـل / ونــواع الفـــــرش والتكــــــييف
شوف للــك الياسر يبكل / أشفت أنت تعيينك تكليــــــــــــف
مــاه تشريف أبد وكبـــل / ما كمت أكلـــت أن تشــــــــريف
أهن ورتب وكرف وعكل / مرتــاب أهن وعكيلل أكـــريف
ولكمت أتحوشك وتنكـــل / مجنون أفاصــل فتشكـــــــريف
مانك عاقل مــك ألعكـــل / هو شــــــــــرط التكلــــــــــــيف
المواطنـــين أتعــــــــابه / وهل السيــاسة كـــــذابة
شمــن أجواقة لعـــــابة / وخلاو العالم بالستحريف
والمنهم ظهــــر صلابة / فالضمير أمنـــــــادم نظيف
تندار أفـــمو نشـــــــــابة / وإكٌلــــــولو خليــــــك أليف
أخيــر أتكز إستجابــــة / وتكٌلب فكــرك فكر ألكيف
وصركلك تجبر لمهابة / فالشعب أيصبح بوك أشريف
والمايزو زي الغـابــة / ذاك أعليه إكزأستنــــــــكيف
ولمذاك الخطـــــــــابة / والضميــــــرأذاك التوصيف
جريمة فيه غـرابـــــة / أمحتاجة قطعـــا للتكييـــــــف
أنحيلـــوه للنيـــابـــــة / وتحيلك للسجن المخـــــــيف
أولاتنفع فيك القرابة / وأهل الوســـــــاطة وتخذريف
ألاتنفع فيك الحجابـة / والكزان وأهل التفتـــــــــــــيف..
أمال الدولة ل شى ينحاش / غير اص كولول كيفاش
كيف اللي مار تيفلاش / وكيف ال مار راجل عفيف
أكيف اللي مار كون اواش/ عقليتهم سركة ولكيف
كيف الوزير اللي فلفاش / ويبدع فاللك أفتلفليف
وكيف المدير اللي حواش / وكيف الولاة وكيف أكيف
وكيف افورنسير الغشاش / اللي متخصص فالتحريف
يبدل فاتورة لكباش / ذابحهم وزير فلخريف
بفاتورة شمن الغشماش / مشر للوزارة ويزيف
النهب اليوم الحك لعراش / وعقلية السركة والتزييف
عند افلان ويسو ول اش / ذاك التـــــــــصنـــيف
برهن ول ادم غراش / سمع ذالبرهان الظريف
خترو عشوائيا فكراش / كايل عن دور للتثقيف
كولول مال الدولة لاش / يكولولكم لاش ال لغريف
والانظمة تتبادل كيفاش / يجي نظام يكز الغيف
يمش ويجي لوخر منتاش / يكز الغيف اعل تكفيف
ويول ويجي لوخر خاش / يلكف والتشبيه الطريف
النسر كبظت كسره جات / ومنين كبظته ولات
وجاو وراه ثنتين اخرات / وكبظ كسرتين الا كيف
النسر كبظت كسره وامشات / شي مانافع فيه اتواكيف
نهب المال العمومي فات / أحرم فالدين الحنيف
مانافعت محاضرات / يقدمه عالم عريف
بالنازل من محكم ليات / وصحيح الحديث الشريف
بيه ال سلوك ال شخصيات / سياسية فانواع الطيف
وعاده الناس اعليه اربات / والعادة ترسخ بالتسييف
الميزانيات اختفات / والخدمات مشات ارديف
واستفسرن عن لخلصات / وكالن موظف شريف
عنهم يفرغ فاباصات / وفكيل التاجر بالتطفيف
ناس من الجفاف اخلات / مارات الحش فمتن الصيف
وطلبت للدولة لاعانات / سندت فالدولة يالطيف
اسند هو هو بالذات / سند الضعيف اعل الضعيف
الدولة فيه لازمات / وقدر من المشاكل عنيف
واله مطروحة ملفات / ال فات اخلك فيه طفيف
وفمشكلات الخدمات / عت تكد تعدل تاليف
الما والظو الا مأساة / تحتاج اعل عمل كفيف
واللي هون من الطركوات / المكدرن كز تسوفيف
واللي هون من الإمارات / الا لحك خمساي بالسيف
واللي هون من المطارات / حد يدير عاد افلارشيف
واللي هون من الجامعات / ماه بالكم ولا بالكيف
التعليم اخسر من لعكاب / اخسر معناه عندي غاب
التلميدي ماه حساب / تخمام فالحساب اكصيف
ولاه سوال ولا جواب / ولا يفصل بين الب والليف
واللي كط اكر من الاداب / راه افيلم ال نور الشريف
وكليبات لعمر دياب / وديكات فمسلسل شقيف
مصاب كراي أخراب / واصلا نجاح مكبظ سيف
متوسط ل راجل مهاب / امن اهل المخزن للتوظيف
ودخل لنِ لنِ عذاب / واتخرج منه كاس الريف
واجبر لخلاص ابان سراب / ما يكف لنص التكاليف
عاد يعنون درس ال لاعراب / اع عنه درس التصريف
والشرط يكول ان اجواب / وفالطويل يكول الخفيف
وافعمليات الحساب / يتل ينكص يكوم يضيف
حامي راص بيه التكلاب / ال تخمام فالمصاريف
امرض وبضغط الدم انصاب / وابك مسمار اكحل نحيف
وشال اجراح معاين لطباب / ادماغ مصاب بنزيف
واثر المشي ماه صواب / ال داخل طب طب اضعيف
واعليه المرض فم اصعاب / وامش بيه الحي اللطيف
الله يثبت لو ثواب / الصبر ويعطيه التخفيف
🔰🔰🔰
🔰🔰🔰
إدعمونا بالمشاركة و الإعجاب و لكم منا جزيل الشكر ❤️
🇪🇭🇲🇷🇲🇦